Barko nasangad 352 pasahero luwas
CEBU, Philippines - Nalangan sa ilang pagdunggo sa pantalan ang 352 ka mga pasahero human nga ang ilang cargo-passenger vessel nga gisakyan nasangad diha sa Lipata bank nga diha sa habagatang bukana sa Cebu Channel nga nasakop sa South Reclamation Project (SRP) habig sa dakbayan sa Talisay kagahapon sa mga alas 4:30 sa kaadlawon.
Si Commander Anelito Gabisan ang chief of staff sa Philippine Coast Guard Cebu Station nga nahinabi sa Banat News kagahapon nagkanayon nga ang M/V Filipinas Ozamis nga gipanag-iya sa Cokaliong Shipping Lines nga gikan sa Ozamis City nasangad sa wala pa hisayring hinungdan.
Gikatahong mibiya ang maong barko niadtong Biyernes sa alas-8 sa gabii padulong dinhi sa dakbayan sa Sugbu.
Ang maong barko adunay 45 ka mga tripulante gipangulohan sa ilang kapitan nga si Capt. Ervin Lumbab. Hinuon walay dautang nahitabo o nangaangol sa mga pasahero ug tripulante sa maong pagkasangad.
Ang Cebu Coast Guard mipadala sa ilang duha ka patrol boat, tulo ka rubber boats ug ang search and rescue vessel nga BRP San Juan aron pagkuha sa mga natanggong nga mga pasahero.
Ang mga pasahero nakadunggo diha sa pantalan sa Pier Uno alas-9 sa buntag. Pipila kanila ang mibutyag nga nakabati sila nga daw kalit nga mimenor ang maong barko ug hangtud nga mihunong na sa pagdagan.
“All the passengers are safe and disembarked already since 9am,” matud pa usab sa gipadalang text messages ni Chester Cokaliong ang tag-iya ug tagdumala sa maong shipping lines.
Ang PCG-Cebu Station naghuwat pa sa Marine Protest ni Capt. Lumbab aron masugdan ang ilang imbestigasyon, samtang wala sad nakitang peligro gikan sa barko ang kadagatan dihang gisusi sa ilang environmental team. (BANATNEWS)
- Latest
- Trending
