DARE program angay ipatuman

CEBU, Philippines - Human mataktak sa katungdanan si kanhi Undersecretary Clarence Paul Ouaminal sa Dangerous Drugs Board (DDB) wala usab mahinayon ang pagpatuman sa Drug Abuse Prevention Program (DARE) nga sugdan na unta pagpatuman sa mga tinun-an sa publikong tunghaan dungan sa subling pagbukas sa klase niining semanaha.

Nasayran nga plantsado na ang DARE Program human kini planoha ni Oaminal kaniadto kinsa nangita og gahin alang sa mga opisyal sa kapolisan nga maoy mobansay sa mga tinun-an sa Grade 5 ug Grade 6.

Gani ang Sugbo pa unta maoy himoong pilot area sa maong programa alang sa pag-edukar sa mga tinun-an sa elementarya aron masayran nila ang dautang epekto sa gidiling drugas.

Apan human siya palagpota ni Presidente Gloria Macapagal Arroyo niadtong Marso 19 ning tuiga, wala na usab maatiman ang maong programa.

Hinuon nanghinaut si Oaminal nga ipadayon ni senator-elect Vicente Sotto III ang implementasyon sa maong programa nga gihulagway niya nga daku og matabang pagsumpo sa suliran sa gidiling drugas sa komunidad.

Ubos sa maong programa nga giduso ni Oaminal, gigahinan niini og 17 ka semana ang pagahimoong training sa mga tinun-an sa elementarya sa mga lecturer nga sakop sa PNP.

Gipasabot ni Oaminal nga aron ikapatuman kining maong programa gikinahanglan niini ang koordinasyon sa Department of Education.  - BANAT NEWS