DepEd, DOH mopatuman sa random drug test sa schools

CEBU, Philippines - Maghiusa ang buhatan sa Department of Education (DepEd) ug Department of Health (DOH) dinhi sa rehiyon alang sa orientation sa mga tinun-an ug naglakip sa hisgutan mao ang random drug test sa publiko ug pribadong tinun-an sa high school level.

Si DepEd-7 Regional Director Ricaredo Borgonia miingon nga ang random drug test pagahimoon sa tanang level sa mga tinun-an sa pagsiguro nga kahimoan og mga lakang kadtong mga nalambigit sa paggamit og ilegal nga drugas.

Sumala pang Borgonia paborableng ipahigayon ang orientation kabahin sa illegal drugs ug ang mismong pagpahigayon og random drug test usa ka semana human sa pagsugod sa klase.

Gipasabot ni Borgonia nga dili kini angayang himoon karong unang semana sa klase tungod sa kadaghan sa mga gimbuhaton sa mga tinun-an sa ilang mga panginahanglan.

Gihangop usab ni Borgonia ang gitanyag sa kapolisan nga mohimo og usa ka oras nga lecture sa mga tinun-an alang sa paghatag kanila og impormasyon sa dautang ibunga sa paggamit og illegal drugs.

Naglakip na niini kun unsaon ang pamaagi paglikay sa tentasyon ug ang pagpasakop sa gang o fraternity nga gipasiugdahan sa grupo sa mga batan-on nga naglihok sa gawas sa tulunghaan. - BANAT NEWS