BRT nagkahayag nang mapatuman

CEBU, Philippines - Nagkahayag na ang posibilidad nga madayon na gyud ang pag-implementar sa Bus Rapid Transit sa dakbayan sa Sugbo human migawas sa resulta sa pasiunang feasibility study nga nagpakitang makabenepisyo ang mga Sugbuanon kun kini maimplementar dinhi.

Gawas pa niini nga gamay ang gastos apan dako ang kitaon sa kagamhanan gikan niini base usab sa gipresentar nga resulta sa feasibility study sa mga consultants sa World Bank ngadto sa konseho niadtong Miyerkuleso.

Ang feasibility study gihimo sukad pa niadtong Oktubre sa milabay’ng tuig hangtud sa Mayo niining tuiga.

Nakita sa maong pagtuon, mokita ang siyudad og US$1.5 million matag tuig ug kini giisip nga dako na kaayong tabang sa pagpalambo og maayo sa ekonomiya sa dakbayan.

Matud pa sa Integrated Transport Planning director Colin Brader nga ang BRT makaserbisyo ngadto sa 317,000 ka mga pasahero matag adlaw.

Human sa maong pre-feasibility study, lain na pung pagtuon nga molanat og usa ka tuig ang himuon alang na usab sa pagpangita og mga dapit diin mag-agi ang BRT sa dakbayan ngadto na sa mga kasikbit nga mga syudad. Gitinguhang masugdan ang BRT karong 2013.  – BANAT NEWS