CEBU, Philippines - Wala na kaabot pang buhi sa tambalanan ang usa ka 36-anyos nga ginang human kini napalgang nagbuwa-buwa na ang baba pasado alas-5 sa buntag sa miaging adlaw sulod mismo sa ilang pinuy-anan sa sitio Tabonan, barangay Tangbo sa lungsod sa Samboan.
Usa ka Pepe Dinapo, 44, taga barangay Calatagan maoy mi-report sa kapolisan nga usa ka Leonora Nillas Lucero, 36, molupyo sa maong lugar ang miyarok og 500 ml nga botelyang muriatic acid.
Si Lucero base sa imbestigasyon gituohang miinom sa maong aksido alas-5 pa sa buntag ug napalgang nagbuwa-buwa ang baba apan aduna pay timailhang buhi pa kini hinungdan nga gidala sa iyang mga kabanay ngadto sa Oslob District Hospital.
Apan samtang nagpaingon pa sila sa maong tambalanan gikatahong nakabsan na kini sa kinabuhi. Si Insp. Abell Laborte, hepe sa Samboan Police station nagkanayon nga dunay nervous breakdown si Lucero ug gani taud-taud na kining masakiton subay sa giasoy sa iyang mga kabanay.
Matud ni Laborte nga kanunay nang magpadungog-dungog si Lucero nga dili na siya makaantos sa maong sakit ug gusto na siyang magpakamatay apan wala lang nila kini panumbalinga kay abi kun nagbinuang lamang si Lucero. – BANAT NEWS