CEDC miawhag sa Orophil pagpresentar og dokumento

CEBU, Philippines - Ang Cebu Energy Development Corporation mipasalig nga misubay sila sa safety rules sa gobiyerno bahin sa ilang operasyon sumala pa ni Mae Melchor, ang Corporate Communications sa CEDC ug midemanda sa shipping firm sa pagpresentar sa mga papeles niini ngadto sa Maritime Industry Authority.

Ang CEDC nakugang sa giluwatang pamahayag sa Maritime Industry Authority (MARINA) nga ang M/V Sycamore Global-1 walay permit to operate human sila mohimo og imbestigasyon sa pagkabangga niini sa Pier 3 sa Toledo Port niadtong Miyerkules sa hapon.

Giingong 30 metros ang gitas-on sa damage sa pantalan sumala pa ni Manuel Tapang Chief Petty Officer (CPO) sa Philippine Coast Guard Toledo City Detachment.

Matud ni Melchor nga gipasaligan sila sa Orophil ang kompanyang nag-operate sa maong barko nga kompleto ang ilang mga permits ug rekisitos sa gobiyerno.

Giawhag karon sa CEDC ang OroPhil pagpresentar sa ilang mga papeles ngadto sa Marina samtang nagpadayon ang imbestigasyon.

Samtang si Engr. Mardon Martin sa MARINA nga usa sa mipahigayon unta og inspeksyon sa pier nakadiskubre nga kulang sa mga papeles ang nahisgutang barko.

Matud ni Martin sa report sa Balitang Bisdak kagahapon nga walay permiso ang maong barko mag -operate ug dili nila kini tugutang makalawig kun walay kompletong dokumentong mapakita ang kompanya.

Apan si Eng. Alex Sobrevega sa OroPhil sa phonepatch interview sa Balitang Bisdak mihimakak niini ug miinsister nga kompleto sila sa mga papeles sa pag-operate sa ilang barko.

Ug matud niini nga mi-comply sila sa tanang inspection nga gipahigayon ngadto sa Manila sa tanang ahensiya sa gobiyerno ug gani duna silay clearance gikan sa PCG nga makabiyahe ang M/V Sycamore. – BANAT NEWS