Drugas motibo sa pagpatay

CEBU, Philippines - Ilegal nga negosyo sa drugas ang gidudahang motibo sa pagpatay sa tulo ka mga lalaki ug miangol og laing tulo atol sa pagpamanhig sa Ompad St. sa Poblacion dakbayan sa Lapulapu sa milabay’ng gabii.

Kini maoy gibutyag ni Sr. Supt. Mariano Natu-el Jr. base sa pasiunang nakita sa ilang imbestigasyon kabahin sa pagbanhig sa mga biktimang sila si Sigfredo Abas, 41; Diosdado Ardiente Jr., 27; ug Rey Niño Donaire, 26, pulos mga ulitawo ug residente sa barangay Pasil sa dakbayan sa Sugbu.

 Samtang ang naangol mao sila si Renato “Rene” Mantorilles, nagmaneho sa awtong adunay plakang KEH 247, Elmer Moñasque alyas Hiyong ug Alejandro Loberdina mga residente usab sa barangay Gun-ob dakbayan sa Lapulapu.

 Ang pagpamanhig sumala pa ni SPO2 Federick Eslit sa Crime Against Persons Desk nahitabo alas 8:30 sa milabay’ng gabii pipila ka minutos human makagawas gikan sa Lapulapu Police Detention Cell si Abas ug Donaire.

Ang duha mipiyansa sa ilang kasong paghupot sa ilegal nga drugas sa dihang nasikop niadtong milabay’ng Martes sa mga sakop ni Insp. Antonio Detoya.

 Ang tulo gikatahong padulong untang managkot sa simbahan sa Birhen sa Regla apan sa pag-abot sa dalan Ompad gituparan kini og duha ka motorsiklo ug gipaulanan og bala sa mga nag-angkas.

 Si Abas naigo sa kilid sa lawas ug bukton ug milahos sa ilok maoy hinungdan sa hinanaling kamatayon niini, samtang si Ardiente naigo sa dughan ug bukton gidali pagdala sa Mactan Doctors Hospital apan patay nang miabot didto samtang si Donaire naigo usab sa aping ug kilid sa lawas nakabsan usab usa ka oras human kini madala sa tambalanan.

 Samtang ang mga kauban niini nga naangol sila si Mantorilles samaran sa walang abaga, Moñasque samaran sa tuong bukton ug si Loberdina samaran sa iyang bukton gidala sa Lapulapu City Hospital diin luwas na sa kakuyaw.

 Atol sa pagresponde sa kapolisan nakuha ang 20 ka mga basiyo sa bala sa kalibre .45 diha sa crime scene.

 Si Natu-el nagkanayon nga ‘vigilante style’ ang pagpatay gumikan sa kasuko sa mga tawo sa pagkuyanap sa ilegal nga drugas ug ang pagdudang posibleng kalambigitan sa illegal drugs ang motibo nga nadungog na kaayong may baruganang “piyait must die.”

Nagduda karon ang kapolisan nga posibleng kaubanan ni Abas ang mibanhig kanila sa pagdudang mipiyait na kini ug mihatag og impormasyon sa mga dagkong nalambigit sa illegal drugs.

 Laing pagduda ni Natu-el mao ang posibilidad nga gi-tumbling o wala pag-remit sa kinitaan sa pagpamaligya sa ilegal nga drugas tungod kay base sa ilang report si Abas usa ka 2nd level nga drug pusher nga makabaligya og 200 ngadto sa 400 gramos matag semana sa dakbayan sa Lapulapu.

Gawas pa niini duna say pagduda ang kapolisan nga posibleng kakompetensya sa negosyo sa ilegal drugas ang mga mamumuno.

 Matud pa ni Natu-el atol sa iyang pakighinabi kang Abas kini mipadayag nga dunay mga tawong mibahad kaniyang patyon ini’g gawas sa detention cell.

 Samtang ang ubang mga kauban ni Abas nga sila si Donaire, Ardiente, Moñasque ug Loberdina aduna nay mga record sa kaso sa ilegal nga drugas apan ang uban napiyansahan.

 Si Mantorilles mao ray walay criminal record ug bag-o lang kining naabot gikan sa gawas sa nasud diin igo lamang gitawag ni Abas aron mo-drive sa iyang sakyanan.  – BANAT NEWS