CEBU, Philippines - Gisugdan na sa kagamhanang lokal sa dakbayan sa Lapulapu ang pagtukod sa bag-ong Lapulapu City Police Office building nga mokabat sa 10 milyones ka pesos.
Matud pa ni Lapulapu City Police Office Director Sr. Supt. Mariano Natu-el Jr. nga dako kini og ikatabang ngadto sa ilang buhatan diin ang karaang police headquarters mamahimo nalang quarters sa mga police personnel.
Sa milabay’ng adlaw gisugdan na sa Lapulapu City Engineering Office ug sa kontraktor ang pagpahigayon sa layout atubangan sa ilang headquarters nga maoy dapit nga tukuran sa duha ka andanang edipisyo sa Lapulapu City Police Office.
Matud pa ni Natu-el, unang plano ni Lapulapu City Lone District congressman-elect Arturo Radaza nga magtukod og bag-ong Lapulapu City Hall ug ang daang city hall maoy himuong police station, apan nausab ang hukom ni Radaza ug mihimo og laing edipisyo alang sa kapolisan.
Ang gahin nga P10 milyones giaprobahan sa konseho ug nalakip kini sa 2010 budget.
Samtang gikalipay usab ni Natu-el ang lakang sa lokal kagamhanan sa Lapulapu ang pagtukod sa “firing range” likod nga bahin sa Lapulapu City Gym alang sa kapolisan sa dakbayan sa Lapulapu nga makabansaybansay sa paggamit sa ilang mga armas. - BANAT NEWS