CEBU, Philippines - Gidakop sa mga polis ang kapitan sa usa sa mga barangay sa lungsod sa Medellin niadtong Martes sa buntag human pasanginling namago og P130 mil sa Pagcor diha sa Korean Village sa barangay Dayhagon.
Matud pa ni Sr. Insp. Bonifacio Arriesgado, hepe sa Medillen police atol sa interview sa DyDD, si Mayor Ricky Ramirez maoy nanawag sa ilang buhatan ug nangayo og police assistance human nangayo og panabang ang manager sa Philippine Amusement and Gaming Corporation.
Dihang naabot ang mga polis gikatahong gipugngan na sa mga security personnel ang maong kapitan (ngalan gipugngan sa Banat News hangtud di kakuhaan sa iyang habig) nga makauli gumikan kay nakapago kini og P130 mil.
Subay sa gihimong imbestigasyon sa kapulisan, alas- 6 sa gabii niadtong Lunes misulod sa maong sugalan ang kapitan apan miuli pagka alas-11 tungod sa brownout.
Mibalik kini pagka ala 1:00 sa kaadlawon ug nagbinuntagay na pagpanugal.
“Murag nagsige kuno ni og ‘call’ sa taya unya napildi niabot og P130 thousand unya mouli na unta kuno ni, mao to ilang gi-hold sa may gate unya nangayo sila panabang sa mayor,” dugang asoy ni Arriesgado.
Nagdumili unta pag-uban ang kapitan apan desididong moreklamo ang tagdumala sa Pagcor batok kaniya hinungdan nga misugot nalang kining mag-abot sila sa buhatan sa kapulisan.
Matud pa ni Arriesgado nagkasabot ang kapitan ug representante sa Pagcor nga hiluton nalang ang problema apan gipa-deposit ang pick up nga sakyanan niini hangtud nga di nila mabayran ang obligasyon. – BANAT NEWS