CEBU, Philippines - Kusganong gipanghimakak sa tigpamaba sa Cebu Energy Development Corp. kon CEDC nga si Kristina Mae Melchor nga ang ilang kompanya nagpasagad lamang sa paglabay og coal ash sa dakbayan sa Toledo sigon sa pasangil sa mga environmental lawyers.
Matud pa ni Melchor nga walay kamatuoran ang mga alegasyon sa mga environmental groups nga gipangulohan ni Atty. Benjamin Cabrido ug Atty. Gloria Estenzo Ramos nga ang CEDC nakahimo na og kadaut sa dakbayan sa Toledo tungod sa paglabay sa hugaw sa ilang power plant nga mao ang coal ash.
Sumala pa ni Melchor bag-o pa lang nag-operate ang ilang duha ka power plants ug wala pa nakalabay og coal ash, gawas pa niini dili pa fully-operational ug naa pa sila sa pag-testing sa duha ka power plants.
Nagduda silang posibleng nasaypan ra nga sa ilaha gikan ang gi-report nga coal ash sa maong pundok.
Ang PR man sa CEDC nga si Junjie Gonzales nagkanayon nga ang CEDC mituman sa clean coal technology samtang nakatubag usab sa problema sa kakulang sa supply sa kuryente dinhi sa Sugbu.
Midugang usab kini nga mismong si Department of Environment and Natural Resources director Allan Aranguez mideklarar na man nga ang coal ash "non-toxic and non-hazardous materials" ug mahimong itambak. – BANAT NEWS