Misaka og 2% ang mga tinun-an sa public schools

CEBU, Philippines - Nisaka og dos porsiyento ang mga tinun-ang nagpa-enroll sa pampublikong tunghaan dinhi sa tunga-tungang kabisay-an karung tuiga nga miabot na og kapin sa 3 milyones atol sa pagbukas sa klase kagahapong adlawa sumala pa sa Department of Education (Dep-Ed)-7.

Si Dep-Ed-7 regional director Recaredo Borgonia mipahibawo dayon nga dunay kakuwang sa mga magtutudlo ingon man mga lawak saringan tungod niining pagsaka og 2 porsiyento sa mga tinun-an

Gumikan niini, nagkanayon ang director nga duna gyuy eskuylahan nga mag double shift gumikan sa kakuwang sa mga classroom.

Hinuon gihulagway ni Borgonia nga malinawon ang pagbukas sa klase kagahapong adlawa sanglit walay mga dagkong problema ang midangat sa ilang buhatan.

Aduna hinuoy mga ginagmay nga problema ang nasugatan sama sa ubang mga tunghaan nga wala makapahigayon dayon og klase kagahapong adlawa.

Matud pa ni Borgonia ang mga tunghaan sa dakbayan sa Mandaue ug Lapulapu maoy ilang namatikdan nga grabe ang pagsaka sa gidaghanon sa mga tinun-an itandi sa milabay’ng tuig.

Misaka usab ang gidaghanon sa mga tinun-an sa Negros Oriental ug mopatuman usab og double shifting aron lang makatungha ang maong mga tinun-an ug kakulang usab sa mga magtutudlo. – BANAT NEWS