Comelec nangandam sa barangay elections

CEBU, Philippines - Gisugdan na og imbentaryo sa Comelec sa dakbayan ang mga kagamitang gamiton alang sa pagpahigayon sa barangay elections karong bulan sa Oktubre.

Si Cebu City election officer Atty. Marchel Sarno mitug-an nga madayon man o sa dili ang piniliay ilang seguraduhong andam kanunay ang ilang buhatan.

Karong Hunyo 18 ang deadline nga gihatag kanila sa Comelec-Manila aron mapasa ngadto sa mga kakulangon nga gamit alang sa barangay elections.

“Mas maayo man gyud na nga andam ta kanunay, nagsugod nami og check kung igo ba ang mga computers ug mga registration forms   sa among office aron smooth ang atong operasyon kung madayon ang eleksyon sa barangay,” matud pa ni Sarno sa Banat News.

Gikatakda sa sunod buwan ang pagsugod og rehistro sa mga bag-ong botante ug mihangyo pa ni Sarno nga mas maayong mokooperar ang mga tawo ug dili maglangay-langay sa pagparehistro aron malikayan ang ginagmay nga mga kagubot.

Wala pay siguro hinuon kun automated election ba susama niadtong Mayo 10 ang pamaagi sa pagbotar apan daan nang mipasidaan ang Comelec nga posibleng manual ra kini.  - BANAT NEWS