CEBU, Philippines - Patay ang usa ka tawo ug naangol usab ang kauban niining minor de edad nga kuyog human sila pamusila sa gidudahang miyembro sa gang sa dalan Zamora, sa barangay Centro, dakbayan sa Mandaue alas-8 pasado ang takna sa miaging gabii.
Ang namatay mao si Anthony Kiamko Cabahug, 22, taga sitio Tribunal sa barangay Centro samtang ang naangol mao ang 14-anyos niining silingan.
Si PO2 Marino Lufranco sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News nagkanayon nga gisundan og tulo ka wala mailhing batan-on ang duha.
Hinungdan nga gibalikan kini ni Cabahug ug gisitar unsay tuyo nga gisundan sila niini apan nakurat nalang sila dihang mibunot ang usa sa tulo ug mipusil kanila.
Si Cabahug misuway unta pagdagan apan naigo dayon sa buko-buko ug walang abaga samtang misutoy usab ang 14-anyos apan gigukod ug gipusil hangtud nga naigo sa bukton.
Ang mga mamumuno daling miikyas human sa pagpamusil samtang gidala ang duha sa Cortes General Hospital apan si Cabahug gideklarar sa mga doktor nga dead on arrival.
Nagduda ang kapolisan nga posibleng paregla lamang o ba kaha kalambigitan sa gang ang hinungdan sa pagpamusil. ( Romeo Limpangog Ug Iris Bulambao PIT ABCommunication Intern)