Missing og 4 ka adlaw naghikog

CEBU, Philippines - Usa ka 45-anyos nga lalaking giingong may gihambing problema ang napalgang patay ug nagsugod na og kadugta nga nagbitay gikan sa usa ka punoan sa kahoy dili layo sa iyang panimalay diha sa barangay Captain Claudio dakbayan sa Toledo niadtong Domingo sa alas 9:00 sa buntag.

Ang gidudahang nagpakamatay mao si Bernardo Lanohan, 45, molupyo sa sitio Manipis sa samang barangay nga sumala pang SPO3 Carmelito Hornales sa Toledo City Police nadiskubrehan sa mga silingan gumikan sa pangalisbo sa langsa kaayong baho.

Si Hornales dihang nahinabi sa Banat News mibutyag base sa gitug-an sa mga silingan sa namatay, namatikdan nila kini sulod ning nanglabay’ng mga adlaw nga magpunay og hinuktok.

Sukad pa niadtong Hunyo 9 nila mamatikding wala na nila kini igkita apan ang kapikas niini nga si Marilyn mitug-an sa kapolisan nga gitawgan siya sa namatay pipila ka adlaw sa wala pa kini makit-ing patay.

Giingong nangayo kini daan og pasaylo sa iyang gihimo o sa buot niyang himuon ug human niana gipawong na dayon ang cellphone ug wala na usab kini nila makit-i.

Nahibaw-an nalang sa pamilya nga patay na kining nagbitay ilawom sa kahoy ug hapit na malata ang patay’ng lawas nga gituohang pipila na ka adlaw nga nagpakamatay. (Darrel Carumba ug Lalaine Calatrava, PIT AB-Com. Intern) (BANATNEWS)