CEBU, Philippines - Naangol ang usa ka 17-anyos nga lalaki human kini mabiktima sa pagpamusil sa gwardiya human kini mokatkat sa koral sa subdivision nga gibantayan diha sa Collin Wood Subdivision sa barangay Basak, dakbayan sa Lapulapu alas-12 pasado ang takna sa miaging tungang gabii.
Ang biktima nga taga Basak Mercado sa barangay Basak sa maong dakbayan napusilan ni Bobby Mapait Lipon, 22, gwardiya sa nahisgutang subdivision nga sakop sa SS 7 Security Agency nga nagbase sa sitio Sangi, barangay Pajo sa maong dakbayan.
Si PO1 John Ricafort sa kapolisan sa nahisgutang dakbayan nga nahinabi sa Banat News miingon nga base sa giasoy sa gwardiya, ang biktima kuyog sa duha pa ka mga batan-ong lalaki nangatkat sa koral sa subdivision nga iyang gibantayan.
Gisinggitan kini sa suspetsado sa pagkanaog agi sa pagbadlong apan wala kini manumbaling hangtud nga nakasulod sa compound hinungdan nga gipusil kini ni Lipon sa iyang service firearm nga kalibre 38.
Ang biktima nga natapsingan sa bala diha sa ulo ug daling gidala sa Mactan Doctors Hospital nga nahimutang duol usab sa maong lugar.
Human sa pasiunang pagtambal dali kining gibalhin sa Vicente Sotto Memorial Medical Center sa dakbayan sa Sugbo ug padayon kining giatiman sa mga doktor.
Ang suspetsado mitahan sa mirespondeng kapolisan ug gibalhog karon sa bilanggoan samtang gitahan niini ang iyang armas uban ang upat ka buhing bala. - BANAT NEWS