20 porsiyentong diskwento sa pletihan sa estudyante tutukan

CEBU, Philippines - Ang konseho sa siyudad sa Sugbu nagtinguhang mapatuman gyud ang 20 porsiyentong diskwento sa pletihan alang sa mga estudyante sa mga pasaheroan dinhi sa siyudad sugod karong pagbukas sa klase.

Giawhag ni Konsehal Arseño Pacaña ang regional director sa Land Transportation Franchising and Regulatory Board kon LTFRB-7 nga si Benjamin Go nga mopahigayon og dayalogo ngadto sa mga driver ug operators sa mga pasaheroan aron estriktong ipatuman sa diskwento sa mga tinun-an.

Si Pacaña nagkanayon nga iyang gihingusgan ang maong panawagan human makadawat ang iyang buhatan og ubay-ubay nga mga reklamo gikan sa ginikanan ug sa mga tinun-an na gyud mismo nga may mga ‘marunong’ nga mga drivers nga dili gyud mohatag og diskwento sa mga tinun-an apil na gani ngadto sa mga senior citizens.

Kini bisan pa man og ang memorandum circular sa LTFRB-Manila nga naghatag og 20 porsiyentong diskwento sa mga tinun-an ug mga senior citizen nga dugay nang gipatuman.

Apan ang mga mapahimuslanong mga drivers ug ilang mga kundoktor nagdumili gyud sa pagtahod niini bisan paman adunay kasong administratibang mahimong masang-at batok sa ilang pangabuhian.

Magsugod na ang tingklase karong adlaw nga Martes angayan lamang nga mohimo og lakang ang LTFRB aron mapahamtangan og silot ang mga pamahimuslanong mga drivers.

Gumikan sa kawalay respeto sa mga drayber sa maong memorandum gisugyot ni Pacaña nga pahamtangan sa labing bug-at nga silot ang drayber nga mamatud-ang nakalapas niini.

Ang labing bug-at nga silot administratiba mao ang pagkanselar sa lisensya sa maong drayber ug did-an na makabaton niini aron makamaneho og sakyanan hangtud sa hangtud ug ang pagkanselar sa prangkisa sa sakyanang pasaheroan. - BANAT NEWS