Consolacion Community College buksan na
CEBU, Philippines - Mokabat sa 600 ka mga tinun-an ang gitakdang motungha sa first year college sa Consolacion Community College (CCC) inig bukas sa klase ugma.
Ang Municipal Administrator sa Consolacion nga si Jersson Marano mibutyag sa Banat News nga pipila sa mga kurso nga gitanyag sa CCC naglakip sa Bachelor of Science in Elementary Education (BSEED), Information Technology (IT) Hotel Restaurant and Management, ug uban pa.
Matud pa niya nga ang tumong sa lokal nga kagamhanan sa pagtukod sa CCC mao ang paghatag og higayon sa tanang mga batan-on sa maong lungsod ilabi na sa mga kabus nga makalampos gayud og kurso sa kolehiyo.
Kini tungod kay matag estudyante pabayron lang og tag P100 sa matag unit ug gaan ra kaayo kun itandi sa mga eskuylahang pribado.
Si Dr. Lolita Rodriguez nga maoy presidente sa maong tulunghaan, uban sa iyang luyo-luyong tagdumala nga si Dr. Marcepina Aguisanda nagkanayon nga giandam na nila ang tanan alang sa pagbukas sa klase.
Matud nila nga ang ilang mga professor nagbansay nang daan sa ilang mga gimbuhaton uban sa ilang mga kahimanan sa pagtudlo sa mga estudyante.
Ang CCC anaa mahimutang sa bag-ong gitukod nga tulo ka andanang edipisyo sa barangay Cansaga sa maong lungsod. - BANAT NEWS
- Latest
- Trending
