Ginhawaan nahabwa pagdunggab

Nahabwa ang ginhawaan sa usa ka lalaki human kini giunay og dunggab sa iyang higala atol sa ilang panag-inom diha sa North Bus terminal sa barangay Subangdaku dakbayan sa Mandaue kagahapon sa kaadlawon.

Ang biktima mao si John David Alastoy, 20, residente sa maong dapit. Samtang gitumbok nga midunggab kaniya mao si Anan Prieto, 30, residente usab sa maong dapit ug suod niyang higala.

Base sa imbestigasyon sa kapolisan sa Station 2, nag-inom ang duha sa usa ka tindahan sa maong dapit apan dangtan pila ka oras sa ilang panag-inom mitumaw ang ilang panaglalis hangtud nga gidunggab ni Prieto si Alastoy og kutsilyo.

Gumikan sa kadako sa samad dinungaban sa tiyan gikatahong nahabwa ang ginhawaan niini hinungdan nga gidala kini sa VSMMC ug kasamtangang giobserbahan sa mga mananambal.

Samtang si Prieto nasikop sa mirespondeng kapolisan ug gikatakdang pasakaan og kaso ugmang adlawa.(

 Sensilyo nagnihit

Ang mga opisyales sa Bangko Sentral ng Pilipinas kon BSP dinhi sa Central Visayas subling mipahibalong padayon ang pagnihit sa mga sensilyo nga magamit dinhi sa Sugbu.

Kini ang resulta sa gipahigayong konsultasyon sa BSP ngadto sa grupo mga negosyante partikular na sa Cebu Chambers of Commerce and Industry ug ubang mga sektor dinhi sa Sugbu.

Ang acting regional director sa BSP dinhi sa Sugbu nga si Maria Luz Berciles nagkanayon nga sulod na sa pipila ka adlaw ang ilang pagpahigayon og pakisusi, minihit gyud og maayo ang nagtuyok nga sensilyo sa Sugbu.

Ang konsultasyon gihimo aron pagsuta kun gikinahanglan pa bang mohimo og dugang sensilyo ang BSP o dili.

Hinuon iyang gipasabot nga kasagaran mahitabo gyud ang pagkulang sa sensiyo nga magamit sa katawhan inig abot sa tungatungang bahin sa tuig sanglit daghan man ang mga tawo nga mogamit niini.(Chester Abadilla)