CEBU, Philippines - Usa ka tawo nga kinsa gikatahapang usher sa illegal nga sugal nadakpan sa kapolisan sa sitio Wireless, barangay Subangdaku, dakbayan sa Mandaue sa miaging gabii.
Ang nadakpan mao si Jesus Lim, 50 , minyo, nga taga Wireless, ug nasakmit usab sa kapolisan gikan kaniya ang mga tip sheet, ug tally sheet nga gisulatan sa nagkadaiyang kombinasyon nga numero sa masiao.
Dugang nga mga ebisdensiya nga nasakmnit sa kapolisan mao ang salapi nga binandol nga tag P20 nga gituohang sa halin sa mga ticket sa masiao.
Ang team sa kapolisan sa Presinto 1 sa maong dakbayan nga gilangkoban nila ni PO3 Robert John Cuyos ug mga kauban maoy nakadakop sa nahisgotang suspetsado.
Ang maong dinakpan gibalhog na karon sa detention cell sa kapolisan ug gitakdang pasakaan kini og tukmang kaso. (Iris Bulambao PIT AB-Com Intern) (BANATNEWS)