CEBU, Philippines - Dul-ang P 1,000 dala ang mga hamburger ang nasakiyo sa duha ka wala hiilhing tulisan gikan sa usa ka teller sa usa ka hamburger outlet sa dalan M.C. Briones, barangay Guizo, dakbayan sa Mandaue sa miaging kaadlawon.
Ang biktima mao si Pedra Villaruel , hingkod, nga lumad nga taga Daanbantayan , ug teller sa Angel Burger sa MC Briones.
Ang biktima mibutyag kang PO2 Arthur Cuyos sa kapolisan sa Presinto 1 sa Centro Police Station, sa maong dakbayan nga sa sayo pa ang duha ka mga batan-ong kustomer nga mga lalaki, mi-order kaniya og hamburger nga balor og P500.
Giatiman dayon niya ang maong order pinaagi sa pagpanulod niini sa mga plastic bag ug dihang nahuman na, gipangayo niya daan ang bayad niini.
Apan nakurat nalang ang biktima dihang imbis kuwarta ang itunol kaniya, armas de fuego man maoy gition kaniya uban sa pahibawo nga tulis.
Diha-diha gipangayo sa duha ka mga tulisan ang iyang halin nga nagkantidad og P400 ug gidala pa ang gi-order niining hamburger nga balor og P500 dayong sakay sa PUJ nga nagpaingon sa lungsod sa Consolacion.
Misaad ang kapolisan nga panid-an nila ang maong mga tulisan.