CEBU, Philippines - Nahanaw ang kinitaan sa usa ka drayber sa taxi dihang gitulis kini sa duha ka armadong tawo didto duol sa PUJ terminal sa barangay Pajo, dakbayan sa Lapulapu sa miaging kaadlawon.
Ang biktima mao si Jose Arnold Oppus, 39, minyo nga taga barangay Paknaan sa dakbayan sa Mandaue ug drayber sa taxi nga nagdala sa plate number GWR 338.
Ang biktima miasoy ngadto kang PO3 Candido Baringue sa Presinto 3 sa barangay Poblacion sa Lapulapu nga nagpahatod ang duha ka wala hiilhi niyang pasahero nga mga lalaki sa bag-ong terminal sa PUJ sa Pajo, sa maong dakbayan gikan sa dalan Plaridel ug A.C. Cortes Avenue sa dakbayan sa Mandaue.
Apan sa pag-abot nila duol sa maong terminal, mikalit og bugnaw ang iyang tangkugo dihang gidaitlan kini sa sumbohan sa armas de fuego sa tawong naglingkod sa iyang likod.
Sa kabalaka nga pabuthon ang maong armas gipasagdan nalang niya ang tupad niyang pasahero sa pagpupho sa tanan niyang kinitaan nga diha sa kahon nga gisudlan niya niini.
Lakip pa niyang gitunol ang kuwarta nga diha sa iyang pitaka ug wala na niya masuta ang tanang kantidad niini gumikan sa iyang kalisang.
Maayo nalang kay human mapupho ang iyang kuwarta mibiya lang usab dayon ang maong mga tulisan nga wala siya hilabti.
Igo nalang siya sa pagsumbong sa maong hitabo ngadto sa kapolisan sa maong dakbayan, kinsa misaad nga panid-an nila ang maong mga tulisan.(Romeo T. Limpangog)