Kapolisan sa Talisay andam na

CEBU, Philippines - Si Superintendent Henry Biñas, hepe sa Talisay City Police Station mibutyag kagahapon nga andam na silang tanan alang sa pagbantay sa mga tulunghaan sa Talisay inig bukas sa klase karong Martes.

Mitug-an siya sa Banat News nga pa-rovingan niya og mga polis ang palibot sa mga eskuylahan aron mabantayan ang mga estudyante gikan sa mga kriminal nga gituohang mopahimulos sa maong higayon.

Matud pa ni Biñas nga tumanon nila ug sundon ang mando sa ilang higher headquarter ug makigdugtong sila sa Department of Education sa siyudad ug sa mga opisyal sa kabarangayan.

Usa sa bantayan sa kapolisan mao ang grupo sa fraternity o mga gang nga posibleng mangagni og mga estudyante niining pagbalik og bukas sa klase.

Si Biñas nagkanayon nga gikinahanglan gyud usab sa mga ginikanan nga mogiya ug motudlo pag-ayo sa ilang mga anak sa mga butang nga makaayo niini uban sa maayong desiplina aron makalampos sa pagtuon ang ilang mga anak.

Ang hepe miawhag usab sa mga estudyante nga mamati sa mga pahimangno sa ilang mga ginikanan ug pahimuslan ang oportunidad sa pag-eskuyla ug dili magpataka og apil sa mga grupo nga walay kaayohan nga ikahatag ngadto kanila.

“Adunay mga kabataan nga wala makaeskuwela tungod sa kalisud sa kahimtang sa panginabuhi, apan adunay mga kabataan nga nag-eskuwela na kay may ikasarang ang ginikanan, apan nag-abusar hinuon ug nagbinuang kay na-impluwensahan sa barkada”, ni Biñas pa.

Ang hepe sa kapolisan sa Talisay miawhag usab ngadto sa mga ginikanan nga suhituhon ug ilhon ang mga higala ug barkada sa ilang mga anak aron masuta nila kung dili ba kini makahatag og dautang impluwensiya kanila.

Si Biñas midugang nga gawas sa mga tunghaan, ang mga bangko ug uban pang mga establisamento sa siyudad lakip usab nga bantayan sa kapolisan.