4 ka sakop sa budol gang sikop

CEBU, Philippines - Upat ka miyembro sa 'Boodle-Boodle Gang' nasikop sa mga sakop s0a Theft and Robbery Section sa Cebu City Police Office (CCPO) sulod sa usa ka mall sa barangay Mabolo , dakbayan sa Sugbo sa miaging buntag. Ang mikagulkol na karon sa prisohan mao sila si Nimfa Sarco, 59, nga taga General Santos, May Ann Torres, 39, taga Liloy, Zamboanga Del Norte, Melanie Santiago, 36, taga Caloocan city ug Marcy Tumulak, 54, nga taga Boog ,Zamboanga Del Sur. Si Chief Inspector Bonifacio Garciano mibutyag sa Banat News nga sa wala pa ang dakop nakadawat siya og tawag gikan sa gwardiya sa mall sa Mabolo kalabot sa maong grupo sa boodle-bodle gang.

Busa milihok dayon siya ug didto naabtan sa iyang mga sakop ang grupo nga buot na usab untang mamiktima og ilarunong tiguwang babaye nga nagpangidaron og 72 anyos

Dihang gisukit sa kapolisan, mitug-an ang tiguwang nga giduol na siya ni Sarco ug sa mga kauban niini, ug gitanyagan og mga maayong negosyo uban sa pangutana kun daghan ba siya og kuwarta.

Si Garciano nagkanayon nga nasuwertihan ang maong tiguwang kay nasanta nila ang maong grupo sa mangingilad.

Nasuta usab nga ang lider sa maong grupo kadaghan na hidakpi sa kapolisan sa mao gihapong kaso.  – BANAT NEWS