P1.8 bilyon asphalting project sa Kapitolyo gi-Ombuds

CEBU, Philippines - Mipadangat og suwat hangyo si Bise Gob. Gregorio Sanchez sa Ombudsman Visayas aron pagpahigayon og pormal nga imbestigasyon sa mga gialegar niyang substandard nga road asphalting projects ni Gob. Gwendolyn Garcia sa kalungsoran sa lalawigan sa Sugbo nga gigahinan og P1.8 bilyones.

Ang suwat ni Sanchez nag-awhag kang Assistant Ombudsman for the Visayas Virginia Palanca Santiago pagpahigayon og sensiro nga imbestigasyon gipadangat nga reklamo sa usa ka Fiel Asendiente nga lumad nga taga lungsod sa Tuburan alas 10:00 pasado sa buntag kagahapon.

Apil sa gisukip sa reklamo ni Sanchez ang mga picture ug video footages sa mga nangaguba nga aspaltadong karsada tungod nga gipasangil ni Sanchez nga substandard pagkahimo.

Ang napulo ka mga lungsod nga nabutang sa reklamo ni Sanchez nga dunay mga barangay nga gipahigayonan sa road asphalting projects mao ang barangay Balirong sa siyudad sa Naga; barangay Sangi-Tabiongan sa San Fernando; barangay Giumbawi-an ug Lut-od, Pinamungajan; barangay Guadalupe siyudad sa Carcar; barangay Basak sa lungsod sa Sibonga; barangay Mantalongon, Dalaguete; barangay Bagalnga, Basak ug Canamocan sa Compostela; barangay Ilihan, Labangon, Caduangan ug Kal-angan sa Tabogon; barangay Manyo ug Kayam sa San Remegio ug barangay Kangkaibe sa isla sa Bantayan.

Si Capitol consultant on information Rory Jon Sepulveda mibutyag nga andam ang gobernador pag-atubang sa maong kaso sanglit duna silay mapakitang kamatuorang mga karaang dalan ug dili pa sa iyang pamunoan, samtang duna say iyang proyektong nangaguba apan giayo na sa mga kontraktor base sa warranty niini.  – BANAT NEWS