3 ka polis Talisay gipalagpot na

CEBU, Philippines - Gipalagpot na gikan sa Talisay City Police Station ang tulo ka polis, usa kanila opisyal, nga gipangrelibohan tungod sa kalambigitan sa nahitabo sa sinagop ni Mayor Socrates Fernandez nga si Joavan.

Ang mga napalagpot mao sila si Sr. Insp. Isagani Abalo, SPO1 Ceriaco Luab ug PO2 Epifanio Comendido Jr.

Kahinumduman nga si Luab ug Comendido maoy gipabantay sa sakyanan ni Joavan sa dihang gipaubos kini sa kustodiya sa kapolisan niadtong milabay’ng semana human sa nahitabong insidente tali kang Joavan ug kang Vincent Joe Castrodes kinsa giingong gitionan og pistola sa sinagop sa mayor.

Si Luab ug Comendido giingong wala kapugong sa mayor sa dihang miabli kini sa sakyanan ug gikuha ang usa ka gamay’ng bag nga puwa nga gipanag-iya sa amiga ni Joavan hinungdan nga gipaubos sila sa imbestigasyon.

Si Sr. Insp. Abalo kinsa maoy deputy niadtong higayona nga nasikop si Joavan gipaubos usab sa imbestigasyon.

Si Supt. Henry Biñas, hepe sa Talisay sa pakighinabi sa Banat News kagahapon mibutyag nga niadtong Huwebes naabot ang order sa nahisgutang tulo ka polis diin gipa-report sila ngadto sa Police Regional Office (PRO-7).

Matud ni Biñas nga sa pagkalagpot sa tulo ka polis sama sa napiangan ang TCPS.

Gihulagway niya nga si Abalo usa ka Talisaynon ug nagtinarong sa iyang pagpanerbisyo.

Samtang si Comendido kinsa sakop sa alert team usa sa iyang responsableng sakop ug masaligan sa trabaho.

Si Luab kinsa gikan sa Barili Police Station pila pa lang kini ka adlaw nga nadestino sa Talisay tungod sa revamp niadtong eleksiyon.

Gawas sa pagkawagtang sa tulo ka polis, ang mga Field Training Police (FTP) dako unta kaayo usab matabang sa mga operasyon sa milabay’ng adlaw gi-recall kini ngadto sa Regional Training School (RTS) alang sa ilang final nga evaluation. – BANAT NEWS