CEBU, Philippines - Ang kontrobersiyal nga sinagop ni Mayor Socrates Fernandez nga si Joavan mihimakak sa mga pasangil batok kaniya sa usa ka registered nurse nga giingong iyang gitiunan og pistola atol sa usa ka interbyu sa RMN-DyHP nga “Birada” ni Atty. Ruphil Bañoc.
Si Joavan dihang gipangutana ni Bañoc sa pasangil mihimakak nga nanion siya kang Vincent Castrodes dihang nagka-engkwentro sila sa trapiko diha sa may Vista Grande sa barangay Bulacao, dakbayan sa Talisay.
Matud usab ni Joavan nga nahibulong siyang miabot ang mga polis sa shop sa gidalhan niya sa iyang sakyanan ug gani iyaha pang gipangkomediyahan ang mga polis.
Gikatahong giimbitar siya sa maong mga polis ug gipaisa ang iyang sinina pagsusi kun wala ba siya’y armas ug nahibulong nalang siyang kalit siyang giposasan ni PO1 Rusty Pelayo ug giingnan siyang adunay mireklamo kaniya ug patawgan nalang ang iyang abogado.
Gibutyag usab ni Joavan nga andam siyang magpa-fingerprint aron itakdo sa makuhang fingerprint sa giingong narekober nga kalibre .45 pistola sa sulod sa iyang kolor puwa nga Isuzu Big Horn nga nagtangag sa plakang YEZ-460. Matud sa mayor nga giadto niya sa shop ang sakyanan diin iyahang nakita sila si SPO1 Ciriaco Luab ug PO2 Epifanio Comendido Jr. nga nagbarog-barog ug giablihan niya ang sakyanan ug gikuha ang bag sa amiga ni Joavan.
Si Fernandez nagkanayon nga walay gibutang nga police yellow line sa palibot sa sakyanan nga timailhang gikustodiya kini sa mga polis ug wala usab siya sitaha aron tan-awon ang bag.
Matud sa mayor nga kung mihangyo pa ang mga polis nga tan-awon ang bag iyaha kining ipahiling.
Ang Cebu Provincial Police Office (CPPO) mibahad og pasaka og kasong “obstruction of justice” batok sa mayor.
Samtang gibutyag usab diha sa maong programa nga napawong og kalit ang flashlight sa searcher nga polis samtang nagsiksik sa sakyanan ni Joavan pinasikad sa search warrant.
Apan kahinumduman nga niadtong tungora dunay mga sakop sa media ug opisyal sa barangay ug mga tanod ang misaksi sa maong pagsiksik.
Matud sa mayor nga gihangyo niya ang mga polis nga pagkabuntag na lang hilingon ang sakyanan apan wala siya paminawa.
Si Talisay City Prosecutor Marshal Rubia nga nahinabi sa Banat News kagahapon nagkanayon nga ang search warrant bisan unsang orasa sa buntag ug sa gabii mahimong iimplementar.
Si Sr. Supt. Erson Digal, director sa CPPO dihang gikahinabi sa Banat News miklarong standard operating procedure ang pag-search sa sakyanan ug bisan unsang orasa basta adunay search warrant.
Giesplikar usab ni Digal nga nalangay ang pagkuha sa search warrant gumikan sa kadaghang gipakompletong rekisitos si Judge Soliver Peras una pa kini mipirma niini pasado alas 10 na sa gabii.
Samtang sa pakighinabi usab sa Banat News kang Joavan nakasaway kini sa pagpanghilabot ni Digal pagtambag kaniya nga dili magpabadlong.
“Ingna na si Digal, nga una siya manghilabot sa akong kinabuhi palimpyohi una na niya iyang tugkaran ug palibot,” matud pa niini.
Si Digal mibutyag nga ang korte nalang unya ang padesideron kun si kinsa kanila ang nagsubay sa balaod.
Si Gob. Gwendolyn Garcia pinaagi sa tigpamaba sa Kapitolyo nga si Rory Jon Sepulveda miklarong dili siya manginlabot sa kaso ni Joavan ug amahan niini sanglit responsibilidad kini ni Bise Gob. Gregorio Sanchez ug mga sakop sa Hunta Probinsyal subay sa Local Government Code. – BANAT NEWS