'Tulisan' nakaeskapo, polis gipriso

CEBU, Philippines - Usa ka gipasanginlang notadong tulisan nga magmotorsiklo ang nakaeskapo gikan sa iyang magbalantay nga polis diha sulod sa Palace of Justice sa dakbayan sa Lapulapu sa milabay’ng hapon.

Ang nakaeskapo mao si Miguel Dayon Manlapas, 32, residente sa sitio Kinalumsan barangay Canjulao dakbayan sa Lapulapu ug nag-atubang og kasong kalapasan sa Comelec gun ban human makuhai og kalibre .45 nga walay lisensiya ug iladong tulisan sa dakbayan sa Lapulapu.

 Matud pa ni PO2 Cerilo Lagumbay nga mga alas 2:30 sa milabay’ng hapon iyang gitawgan si SPO3 Jesus Geminea, kaubang jailer aron ipahatod si Manlapas ngadto sa RTC Branch 54 kay gipangita kini sa huwes alang sa iyang “commitment order” ngadto sa Lapulapu City Jail.

 Human mahatud ni SPO3 Geminea si Manlapas ngadto sa korte iya kining gibilin ngadto ni PO2 Lagumbay kay mobalik kini sa detention cell nga iyang gibantayan.

Giingong gawas kang Manlapas duna pay babayeng dinakpan nga gibantayan niadtong tungura si Lagumbay apan tua sa pikas sala sa maong korte. Sa dihang gidala ni PO2 Lagumbay si Manlapas sa RTC Branch 54 wala kini dayon matagad sa huwes apan naatlan usab nga gitawag si Lagumbay sa pikas sala aron ipresentar ang dinakpang babaye hinungdan nga iyang gibilin si Lagumbay sa RTC Br. 54, apan sa iyang pagbalik wala na kini.

 Gumikan niini nagkagubot ang buhatan sa Palace of Justice ug gipangita ang pugante apan bugtong ang yellow t-shirt nalang nga adunay markang “Detainee” ang ilang narekober.

 Gumikan niini, gipabilanggo ni Lapulapu City Police Office Director Sr. Supt. Mariano Natu-el Jr. si Lagumbay ug gikatakda kining pasakaan og kasong administratiba base sa kalapasan sa Art. 224 sa Revised Penal Code RPC diin naglatid nga “Evasion through negligence.”

 Samtang tun-an pa ni Insp. Manruf Bantug ang hepe sa Investigation and Detective Management Branch kung aduna bay tulobagon si SPO3 Geminea sa maong insidente.

 Samtang nasagmuyo si Insp. William Homoc ang Hepe sa Crime Against Persons desk (TRS) ug mga kauban gumikan sa ilang kahago sa pagsikop kang Manlapas nga ilang gikunsiderar nga usa sa mga notadong tulisan ug kawatan sa dakbayan sa Lapulapu.

 Gumikan niini nanawagan si Lagumbay ngadto sa mga kabanay ni Manlapas nga kung kini makauli sa ilang dapit ipa-boluntaryo kini pagpatahan.

Mao na kini ang ikaduhang higayon niining tuiga nga naeskapohan og dinakpan ang dakbayan sa Lapulapu. – BANAT NEWS