CEBU, Philippines - Gikwestyong mga balota diha sa lungsod sa San Fernando gihatud na kagahapong adlawa diha sa korte alang sa pagpahigayon og recount gumikan sa election protest nga gisang-at sa naparot nga mayor sa lungsod nga si outgoing mayor Lakambini Reluya.
Si Reluya mikwestyon sa kadaugan sa iyang kaatbang nga si Bise Mayor ug karon Mayor-elect Abe Canoy sa milabay’ng eleksyon niadtong Mayo 10.
Dili muminos 49 ka mga ballot boxes gikan sa 49 ka mga clustered precincts sa maong lungsod ang gikarga sa upat ka military six-by-six trucks kagahapon sa buntag nga gi-eskortan og 20 ka mga polis paingon sa sala ni Regional Trial Court (RTC) Branch 11 Judge Ramon Daomilas Jr. kagahapon sa buntag.
Apil sa mikuyog sa mga ballot boxes ang tag lima ka mga representante sa isig kampo ug mga representante gikan sa Parish Pastoral Council for Responsible Voting (PPCRV).
Ang maong mga ballot boxes kasamtangang ikustodiya sa RTC Branch 11 alang sa pagahimuong recount sa maong mga balota.Si Reluya gipildi ni Canoy sa milabay’ng eleksyon og kapin usa ka libo ka botos. – BANAT NEWS