Mipatay sa kapuyong babaye gipangita

CEBU, Philippines - Gipangita sa kapolisan ang usa ka tawo nga gitumbok nga maoy nagpusil patay sa kapuyo niini niadtong miaging adlaw sa gipuy-an nilang panimalay sa Zone Ubi, barangay Paknaan, dakbayan sa Mandaue.

Si PO3 Edgar Pasaylo sa kapolisan sa Basak Police Station miasoy sa Banat News nga ang gipangita mao si George Bontoyan, 33, lumad nga taga Pulpogan, lungsod sa Consolacion ug nagpuyo sa nahisgotang lugar.

Matud pa ni SPO1 Pasaylo nga si Bontoyan suspetsado sa pagpusil patay kang Arlene Ulan-Ulan, 38. Silang Bontoyan ug Ulan-Ulan nakabaton na og anak.

Si SPO1 Pasaylo miingon nga nagkabikil si Bontoyan ug Ulan-Ulan pipila na ka bulan ang nakalabay ug ang nahauna mibiya na sa ilang gipuy-ang balay.

Si Bontoyan kalit lang mitumaw sa ilang balay ug naabtan nga si Ulan-Ulan nga didto sa panimalay sa silingan niining si Julita Mata.

Gitawag ni Bontoyan si Ulan-Ulan alang sa pagpakigsulti ug sa tinguha nga magbalik sila sa ilang panagtipon og puyo uban sa ilang anak.

Si SPO1 Pasaylo miingon nga nagdumili sa pagpakigbalik si Ulan-Ulan ug mipahibalo nga taliabot na ang langyaw niining hinigugma sa sunod bulan.

Matud pa ni SPO1 Pasaylo nga si Bontoyan kinsa wala na makapugong sa iyang kasuko mikuha sa dalang armas ug gipusil ang biktima sa ulo nga maoy nakaingon sa hinanali niining kamatayon.

Human sa maong pagpusil, si Bontoyan kinsa nagsakay sa iyang motorsiklo uban sa 7-anyos nilang anak, dali kaayong nakasibat pahilayo sa maong dapit.

Sa hot pursuit operation nga gipangulohan ni Insp. Ramil Morpos, ilang nakaplagan ang 7-anyos nga anak nga gidala sa suspetsado sa iyang pagsibat nga gibilin sa igsuon niini sa Pulpogan, Consolacion ug mipadayon kini sa pagsibat luwan sa motorsiklo ug wala na masayri kun hain kini mopaingon. – BANAT NEWS