CEBU, Philippines - Gipakagamay lamang sa kagamhanan sa siyudad sa Sugbu ang gipasakang kaso sa Kapitolyo batok ni City Traffic Office Management kon CITOM chief executive Arnel Tancinco labot sa pagguroy sa trailer flat bed sa Kapitolyo nga nakaparada sa dalan sa Don Mariano Cue ning siyudad sa Sugbu.
Sumala pa ni City Atty. Joseph Bernaldez dili angayang mahadlok si Tancinco sa kasong kalapasan sa Graft and Corrupt Practices Act ug kasong pagpangawat nga gisang-at ni Provincial Administrator Eduardo Habin subay sa kamandoan ni Gob. Gwendolyn Garcia pinaagi sa Provincial Legal Office.
Kini tungod kay walay igong basehanan ang maong kaso ug usa lamang kini ka bawos tungod sa pagsakmit sa trailer sa Kapitolyo.
Matud pa niini nga siguradong makalingkawas sa maong kaso si Tancinco tungod kay wala may factual bases ang pangangkon sa Kapitolyo nga sila maoy nanag-iya niini.
Sigon sa city legal officer sa siyudad sa Sugbu nga ang lig-ong basehanan nga gipanag-iya sa Kapitolyo ang maong trailer mao ang registration ug ingon man ang pagbayad og P30 mil nga bayad sa pagpag-impound sa trailer sa ground sa CITOM.
Matud pa niini nga walay kalapasan sa graft and corruption ang CITOM official sanglit igo lamang kining naghimo sa ilang katungdanan kay nakalapas man sa city ordinance ang Kapitolyo ug ang mga opisyales niini maoy angayan nga manubag sa kalapasan. – BANAT NEWS