Joavan gawasnon na

CEBU, Philippines - Gawasnon na karun ang kontrobersyal nga sinagop ni Talisay City Mayor Socrates Fernandez nga si Joavan human kini makapiyansa kagahapon sa buntag diha sa sala ni Judge Menrado Paredes sa Regional Trial Court Branch 13.

Gikatahong ang mga higala ni Joavan maoy nag-amot amot aron makapiyansa kini pinaagi sa surety bond ni Joavan nga diin mibayad siya og P40 mil sa duha ka kaso nga mao ang illegal possession of firearms and ammunition ug kalapasan sa Comelec gun ban.

Matud pa sa suod nga higala ni Joavan nga nagdumili pagpaila sa kaugalingon usa siya sa mitabang nga makapiyansa ni Joavan ug diin lakip na niini ang pipila nila ka mga higala.

Samtang atol sa pagpiyansa, si Joavan mibutyag nga wala pa gyud siya magka-estorya sa iyang amahan apan susama sa ubang tubag ni Joavan wala na kini mikomento kalabot sa pasangil ni Vincent Castrodes nga pagpanion niadtong nakalabay’ng semana sa atubangan sa Alta Vista Subdivision sa barangay Bulacao siyudad sa Talisay.

Apan ang kontrobersya wala pa matapos kang Joavan human ang mayor gipasanginlan sa mga polis nga mipugos sa pagsulod sa Isuzu Big Horn nga gisakyan ni Joavan ug mikuha sa usa ka bag sa sulod bisan gidid-an sa mga polis.

Hangtud karun pabiling nagpakahilom ang mayor kabahin sa maong isyu.

Sa laing bahin, dili na motan-aw lamang ang Department of Interior and Local Government sa mga panghitabong gikalambigitan ni Mayor Fernandez gumikan sa mga binuhatan sa sinagop niining si Joavan.

Sumala pa ni director Pedro Noval nga mopahigayon sila og imbestigasyon sa gipasangil sa kapolisan nga pag-interbiner sa mayor sa imbestigasyon sa kapolisan.

Partikular nga susihon sa DILG-7 ang giingong pagpamugos sa mayor pag-abli sa Isuzu Big Horn nga gisakyan ni Joavan nga gikostudiya sa kapolisan ug mikuha sa usa ka bag sa sulod niini.

Ang mayor giplanohang pasakaan og kasong obstruction of justice sa maong hitabo.

Ang resulta unya sa imbestigasyon sa DILG-7 iduso nila ngadto ni Gob. Gwendolyn Garcia ug ang gobernadora maoy moduso ngadto sa Sangguniang Panlalawigan.

“The governor is a supervisory body over the component cities in the province of Cebu,” matud pang Noval ug midugang nga mahimo usab nila kining isumiter ngadto sa Ombudsman

Si Noval mitambag usab sa mayor nga paminawon ang sugyot sa mga higala sa mayor ug sa kapolisan nga boluntaryong ipasulod sa rehabilitasyon si Joavan.

“Akong advise niana kay dako naman kaayo nang problemaha uyon nalang siya (mayor Soc) to submit his son for rehabilitation aron dili na siya maapil sa problema sa iyang anak. Dili niya tapin-an kay nakasala iyang anak, then itaral na sa hukmanan and they can accept unsay silot sa korte.. served as a model,” pamahayag pang Noval.

Ang legal counsel sa DILG-7 nga si Danilo Almendras mibutyag nga dili na sila buot magpakalihom pa sa mga nanghitabo sa gihulagway nga pagtabon-tabon sa mga hiwing binuhatan sa anak niini.

Si Almendras nagkanayon nga nahibawo ang mayor nga sayop ang iyang gihimo ug posible siyang mag-atubang niini og kasong obstruction of justice.

Si Joavan nag-atubang og tulo ka kaso human siya gipasakaan og kasong Grave Threat, Illegal Possession of Firearms, kalapasan sa Comelec gun ban.  – BANAT NEWS