Duha gipamusil sa Mingla

CEBU, Philippines - Pulos anaa sa talandugong kahimtang ang 19-anyos nga batan-ong lalaki nga gituohang notadong kawatan ug ang kauban niining minor de edad human gipamusil diha sa Ward-2, Poblacion lungsod sa Minglanilla niadtong Lunes sa alas 8:00 sa gabii.

Ang mga biktima mao si Jenifer Pacultan, alyas Bin Ladin, 19, molupyo sa dakbayan sa Talisay ug ang kauban niining 16-anyos nga molupyo sa nahisgutang lugar.

Matud pa ni PO1 Sean delos Reyes sa Minglanilla Police dihang nahinabi sa Banat News, ang mga biktima naglakaw sa dalan sa maong lugar dihang kalit giduol sa usa ka nagsuot og ski mask ug walay daghang pangutana diretso kanila og pusil upat ka higayun.

Human sa pagpamusil daling misibat pahilayo, si Pacultan nakaangkon og samad pinusilan sa walang bahin sa apapangig nga milapos ang bala sa tuong bahin sa liog, samtang ang 16-anyos naigo sa bukobuko.

Daling gihatud ang duha sa Minglanilla District Hospital apan tungod sa talandugong kahimtang gibalhin sila sa Vicente Sotto Memorial Hospital (VSMMC). Ang biktimang minor de edad mitug-an sa mga polis nga ang mipusil kanila dakong tawo ug bangason.

Matod ni PO1 delos Reyes   nga si Pacultan gipasanginlan na kaniadto nga maoy tigpanglungkab sa maong lugar. – BANAT NEWS