Lolo namaligya'g shabu gidakop

CEBU, Philippines - Nadakpan sa kapulisan ang usa ka 61-anyos nga lolo nga taga siyudad sa Carcar nga giingong maoy responsable sa pagpayuhot og ginadiling drugas sama sa shabu sa barangay Matutinaw lungsod sa Badian niadtong Lunes sa alas 11:05 sa gabii.

Ang nadakpan sa gipahigayong buybust operation sa kapulisan sa lungsod sa Badian ug mga sakop sa Philippine Drugs Enforcement Agency (PDEA-7) giilang si Pedro Delubio Padin, 61, lumad nga taga barangay Napo siyudad sa Carcar.

Matud pa ni PO1 Randy Balansag, imbestigador sa Badian Police dihang nahinabi sa Banat News kanunay na silang makadawat og reklamo may labot sa pagpayuhot og shabu sa maong suspek diha sa ilang lugar.

Gikatahong mipalit og shabu ang poseur buyer sa kapolisan kang Padin diha sa baybayon samtang kini nakig-inom sa mga higala.

Dihang gitunol na sa suspek ang duha ka paketeng shabu ug midawat sa marked money nga P400 dali siyang gisikop sa nagbantay nang mga polis diha sa palibot.

Nadiskubrehan usab sa sudlanan sa iyang cellphone ang lain pang siyam ka gagmay’ng paketeng mga gidudahang shabu nga mokantidad og tag P300 matag usa.

Matud pa ni Balansag dugay na nilang gipanid-an si Padin apan matag mopahigayon sila og operasyon batok niini kanunay kining makabantay. – BANAT NEWS