CEBU, Philippines - Gipahibawo ni Capitol Consultant on Information Rory Jon Sepulveda mi-apply na ang Kapitolyo og Environmental Compliance Certificate (ECC) ngadto sa Department of Environment and Natural Resources alang sa napalit nga Balili lot diha sa barangay Tinaan sa dakbayan sa Naga.
Kini aron wala nay makababag pa sa ilang paggamit sa coal ash gikan sa Korean Electric Power Corporation (KEPCO) isip filling materials sa reclamation project sa kontrobesiyal nga Balili Property bisan pa man og gisaway kini sa mga environmentalists.
Gipasabot ni Sepulveda nga hangtud karon ang mga mibabag nga mga environmentalists wala pa gihapon makapakita og igong dokumentong nagsuporta sa ilang baruganan nga dili mahimong gamitong filling materials ang coal ash.
Apan gitataw ni Sepulveda nga kun may mapakitang dokumento ang mga environmentalists nga dili puwede magamit ang coal ash dili ipadayon sa kapitolyo ang paggamit niini.
Nasayran nga karong bulan sa Nobiyembre, ang kapitolyo gikatakdang magsugod na pagpatuman ang kontrata sa KEPCO nga mohipos sa coal ash ug adto itambak sa Tinaan.
Samtang iyang gisalikway ang gibuhiang pamahayag sa usa sa mga legal officer sa DENR nga si Trania Lee Ferrer nga imbalido ang titulo sa yuta sa Kapitolyo nga sa Balili Property.
Iyang gipasabut nga ang mismong labaw sa Environmental Management Bureau (EMB) sa DENR mitumbok nga wala sila’y dokumentong nagpakitang kwestiyonable ang titulo.
Si Sepulveda nagkanayon nga dili usab sila mosagop sa tinguha sa mga environmentalists nga i-convert ang maong yuta balik ngadto sa national government tungod kay 90 porsiyento niini ang nalubog sa tubig dagat ug kabakhawan kay ang kagamhanan sa lalawigan sa Sugbu man ang nakapanag-iya niini. – BANAT NEWS