Kapitolyo mikiha na batok Citom

CEBU, Philippines - Pormal nang gipasakaan sa Kapitolyo og kasong kriminal ug administratiba ang mga opisyales sa Cebu Integrated Traffic and Operation Management (CITOM) ngadto sa buhatan sa Ombudsman Visayas kagahapon sa buntag tungod sa gihulagway nilang ilegal nga pagguroy sa trailer flat bed sa Kapitolyo diha sa Don Mariano Cui duol sa Fuente Osmeña ning siyudad sa Sugbu.

Si provincial administrator Eduardo Habin inabagan ni Provincial Atty. Mariano Martinquilla maoy nagsilbing complainant sa maong kaso batok kang CITOM Chief Executive Arnel Tancinco ug laing duha pa ka mga traffic enforcers.

Matud pa ni Martinquilla nga kasong kalapasan sa Anti-Graft and Corrupt Practices Act ug kasong pagpangawat ang ilang gipasaka sa maong mga opisyales.

Si Martinquilla miingon nga ilang nakitang walay basehanan ang pagguroy sa trailer sanglit gibutang man kini sulod sa gipanag-iyang yuta sa Kapitolyo ug wala usab kini makabalda sa trapiko kay gibabag isip kural aron di masudlan ang luna.

Kini usab ang hinungdan nga nagdumili ang Kapitolyo sa pagbayad og kapin sa P30 mil nga multa ngadto sa CITOM bugti sa pag-uli sa maong trailer.

Si Martinquilla mitumbok nga sa pagkakaron ang iyang buhatan nagpadayon pa sa pagtuon sa ilang nakuptang mga ebidensiya alang sa pagpasaka og dugang pang kaso sa korte ug aron mabawi ang maong ekipo. Sa sayo pa, sila si Tancinco mipadayag sa ilang kaandam pag-atubang sa bisan unsang kihang ipasaka batok kanila sanglit nagtamod sila sa traffic ordinance sa dakbayan. (BANATNEWS)