CEBU, Philippines - Gipahibalo sa Visayan Electric Company (VECO) nga maminusan na ang mga brownouts dinhi sa Metro Cebu Area kun magpadayon na ang pagsige og bunok sa ulan. Sumala pa sa tigpamaba sa Veco nga si Ethel Natera nga namatikdan na nilang daan nga panahon sa ting-ulan menos kaayo ang demand sa kuryente kumparar sa ting-init.
Usa sa rason niini mao nga ang mga appliances nga pampabugnaw sama sa aircon ug electric fans dili na kaayo gamiton sa mga konsumidor gumikan kay dili na kaayo init ang panahon.
Samtang momenus usab ang paggamit og uban pang appliances tungod kay sagad sa mga kabataan atoa sa mga tunghaan karong magsugod na ang klase sa Hunyo 15.
Apan si Natera miklaro nga ang pagsugod sa pag-ulan kagahapon wala pay epekto sa pagminus sa demanda sa kuryente tungod kay dili man sad dugay ang ulan ug padayon gihapong nasinati ang tumang kainit karon. Si Natera miingon nga sigon sa iyang nadawat nga impomasyon gikan sa National Grid Corporation of the Philippines (NGCP) ang kakulangan sa supply sa kuryente dinhi sa Central Visayas moabot sa 200 ka megawatts.
Kini ang hinungdan nga aduna pa gihapoy usa ug tunga ka oras nga rotation brownouts sa mga service area dinhi sa Metro Cebu Area apan kini mas arang-arang sa nakalabay’ng semana nga halos miabot og 300 ka megawatts nga kakulang sa supply sa kuryente.
Hinuon gitataw ni Natera nga karong Hunyo 12 mosugod na og operate ang mga planta sa Cebu, Bohol, Negros ug Panay nga gipaubos sa preventive maintenance sulod sa pipila ka semana. (BANATNEWS)