3 ka kaso vs. Joavan wa ma-file kay brownout

CEBU, Philippines - Wala matiwas ang pagpasaka og tulo ka kaso batok sa sinagop ni Talisay City Mayor Socrates Fernandez nga si Joavan Fernandez kagahapon gumikan sa brownout.

Ang kapolisan sa dakbayan sa Talisay ug Provincial Investigation and Detective Management Branch (PIDMB) mipasaka unta kagahapon og kasong grave threat, kalapasan sa Comelec gun ban ug illegal possession of firearms and ammunition batok sa sinagop sa mayor.

Kini may labot sa iyang pagpanion og armas niadtong Biyernes sa hapon diha sa Vista Grande sa barangay Bulacao dakbayan sa Talisay sa usa ka Vincent Jose Castrodes nga taga F. Llamas sa barangay Labangon dihang diriyot magkabangga ang ilang sakyanan niadtong tungora.

Kagahapon sa udto gipatawag ni Digal si Castrodes ug ang upat ka polis sa Talisay nga wala makapakgang sa mayor dihang giablihan niini ang Isuzu Big Horn nga gisakyan ni Joavan nga gipabantayan kanila ug gikuha ang usa ka pula nga bag.

Atol sa pagpahigayon sa inquest proceedings kang Joavan diha kang assistant prosecutor Benjo Luthar Marcion, kini nagdumili pagluwat og counter affidavit ug mitugot nga iduso nalang ang maong kaso ngadto sa buhatan sa regional trial court.

Matud pa ni assistant prosecutor Marcion nga human nila maduso ang maong kaso sa buhatan sa regional trial court mamahimo nang mopiyansa ang anak sa mayor sa kantidad nga P160 mil.

Si Joavan dihang gikahinabi sa mga tigbalita mibutyag nga wala pa sila magka-estorya sa iyang amahan ug sa pagkakaron magpatabang nalang siya sa iyang mga ‘batos’ aron makapiyansa. Daan nang gipanghimakak ni Joavan ang mga pasangil ni Castrodes.

Si Castrodes giubanan sa iyang amahan ug ni Insp. Ruben Cuizon ang hepe sa PIDMB kinsa maoy miabag sa kapolisan sa Talisay aron mapasaka ang kaso batok sa anak sa mayor.

Si Castrodes sa iyang bahin dihang gikuhaan og reaksyon sa mga tigbalita nagkanayon iya gyud ipadayon ang kaso batok kang Joavan.

“Ipadayon ni nako, nasugdan naman ni,” matud pang Castrodes kinsa miklarong walay nag-aghat kaniya sa pagpasaka kundili ang gibuhat ni Joavan kaniya maoy nag-aghat nga pasakaan niya og kaso ang anak sa mayor.

“At least dili niya mausab ngadto sa ubang tawo ang gibuhat niya diri nako,” dugang pa ni Castrodes.

Sa pagkakarun wala siyay interes nga mangayo og proteksyon ngadto sa kapolisan.

Si Sr. Supt. Erson Digal, hepe sa kapolisan sa lalawigan nagkanayon nga kasong illegal possession of firearms ingon man kalapasan sa Comelec gun ban ug grave threat ang ilang gisang-at nga kaso batok kang Joavan kagahapon sa hapon diha sa piskaliya sa dakbayan sa Talisay.

Buntag pa unta isang-at ang kaso sa piskaliya sa dakbayan sa Talisay apan naabtan sila sa pagpanira sa piskaliya human nalangan ilang trabaho pagkabuntag tungod sa brownout. Samtang napakyas sila sa pagpasaka og kasong obstruction of justice batok ni Mayor Fernandez kagahapon sanglit ila pang gipaabot nga makuhaan og affidavit ang upat ka mga polis nga sila si SPO1 Ceriaco Luab, SPO1 Ricardo Balbutin, PO2 Epefanio Comendido ug PO1 Rusty Pelayo.

Matud pa ni Digal sa ilang tan-aw nakalapas gyud ang mayor sa pag-abli sa sakyanan ug pagkuha sa bag diha sa sulod base usab sa pamahayag sa nagbantay nga sila si Luab ug Comendido.

Sa laing bahin, dunay imbestigasyong himuon batok sa napakyas nga mga polis pagpakgang sa mayor pagkuha og butang diha sa maong sakyanan ug hayan makasuhan sila og neglect of duty nga may silot nga pagkasuspenso kun mapamatud-an.

Matud pa ni Cuizon dili rason ang kahadlok nila sa mayor nganong wala nila kini mapugngi.

Si Digal miingon nga modangop usab sila sa Department of Interior and Local Government (DILG) nga si director Pedro Noval alang na sa posibleng atubangon sa mayor nga administratiba.

Iya usab gimandoan ang hepe sa dakbayan sa Talisay nga si Supt. Elmer Lim nga ipaubos sa drug test si Joavan aron duna silay record niini diha sa Talisay.

Kagahapon gidiretso na og dala sa Talisay City Jail si Joavan samtang magpaabot sa arraignment sa iyang kaso. (Rey Pasaporte ug Lesley Caminade) (BANATNEWS)