CEBU, Philippines - Ang Liberal Party ug ang grupo nga nagbantay sa Aquino-Roxas Bantay Balota (ARBB) kagahapon miinsister nga kinahanglang ipatuman gyud ang mano-mano nga pag-audit sa mga balota aron nga dili matangtang gikan sa listahan sa mga botante ang mikapin tulo ka milyon ka mga botante kansang mga boto wala mahilakip sa gihimong nasudnong inihapay sa mga balota human sa piniliay niadtong Mayo 10.
Matud pa ni Joey Tenefrancia, ang national coordinator sa ARBB nga ang random manual audit (RMA) mao nalay nagpabiling panukdanan aron sa pagkonpirmar sa pagkabalido sa gipakanaog nga desisyon sa Commission on Elections (Comelec) sa pagpa-walay bili ang 2.6 milyones ka mga boto nga gikasar alang sa nagpapiling mga kandidato sa pagka-bise presidente sa nasud sa milabay’ng eleksyon.
Sa samang higayon dinhi usab masuta sa grupo nga nag-inihapay sa mga balota ang tinuod nga resulta sa piniliay niadtong Mayo 10 kun kini naklaro ba gyud nga nag-agi sa mga makina sa Precinct Count Optical Scan (PCOS), matud pa ni Tenefrancia.
Kagahapon misalida si Tenefrancia didto sa hawanan sa Kongreso atubangan sa grupo nga gitugyanan sa pag-inihapay sa Certificates of Canvass (COC) diin iyang giinsister ang kamahinungdanon sa pagpatuman sa RMA.
Ang LP-ARBB mitahas sa Comelec sa pagpatuman sa RMA aron nga dili mausik ang mga botos nga gikasar sa 2.6 milyones ka mga botante sa miaging piniliay.
Kini tungod kay kun iinsister sa Comelec nga wad-an og bili ang maong mga boto, magpabiling dili na hikalimtan sa kadaghanan ang mansahon nga sistema sa unang automated nga piniliay dinhi sa nasud, matud pa ni Tenefrancia.
Gumikan kay gikulipa sa PCOS, wala na ilakip sa Comelec sa opisyal nga inihapay sa mga balota ang maong mga boto, usa ka butang nga dili angay, matud pa ni Tenefrancia.