Nangawat og alahas gipriso

CEBU, Philippines - Nasikop sa kapolisan sa miaging buntag ang usa ka katabang sa balay kinsa suspetsado sa pagkawat sa himabaw sa P 1 milyon nga mga alahas sa balay nga iyang gialagaran sa dalan Kabajar, barangay Guadalupe dakbayan sa Sugbo.

Ang biktima nailhan nga si Monnette Gemina, 45, nga taga Guadalupe samtang ang suspetsado mao si Eunice Pelayo Luyao, 24, lumad nga taga barangay Bagasawe, lungsod sa Tuburan.

Sa pakighinabi sa Banat News ni PO2 Melvin Jimenez sa Guadalupe Police Station, kini mibutyag nga nadiskobrehan sa biktima ang maong pagpangawat niadto lang miaging adlaw dihang nadiskitahan niya nga nag-anam pagkawagtang ang iyang mga alahas sa iyang sudlanan.

Busa nakadesider siya nga susihon ang lawak sa suspetsado ug didto nakurat siya dihang nakita niya ang naglaundok nga mga resibo sa gipamrendang alahas niini sa nagkadaiyang kantidad.

Dihadiha gumikan sa iyang kalagot, midangop dayon siya sa kapolisan sa Guadalupe ug gisumbong ang maong hitabo

Ang mga polis mihimo usab dayon og lakang aron sa pagsikop sa suspetsado.

Uban sa pagsikop, nasakmit usab sa kapolisan ang 28 ka mga resibo sa nagkadaiyang mahalong alahas gikan sa ilado na kaayong prendahanan ning dakbayan.

Sa pagkakaron nagkagulkol na ang suspetsado sa prisohan ug gitakdang pasakaan og kasong qualified theft karong adlawa.  – BANAT NEWS