CEBU, Philippines - Nadakpan sa kapolisan ang usa ka tawong gikatahapang mamaligyaay og mga linikit nga pinaugang dahon sa marijuana atol sa buy bust operation sa miaging gabii sa sitio Pag-utlan sa barangay Umapad, dakbayan sa Mandaue.
Ang nadakpan mao si Rizaldy Alilin Caputalo, 29, nagpuyo sa maong dapit kinsa nasakmitan og mokabat sa 25 ka gituohang linikit nga pinaugang dahon sa marijuana.
Si PO2 Arnold Labine sa Presinto 5 sa Opao Police Station nga nahinabi sa Banat News miingon nga si Sr. Insp. Alfredo Ortiz uban sa mga sakop mipahigayon sa maong buy bust operation human makadawat og impormasyong namaligya si Caputalo og marijuana sa maong lugar.
Dihang gitunol sa suspek ang marijuana ngadto sa poseur buyer kalit kining gidakop ug nakuhaan og 25 ka linikit nga marijuana ug ang buybust money. – BANAT NEWS