Gipatay sa ig-agaw tungod sa babaye

CEBU, Philippines - Usa ka bana ang nagtingkagol karon sa bilanggoan human midunggab-patay sa iyang ig-agaw tungod sa iyang kasuko nga giunay og ‘kabit’ sa biktima ang iyang asawa.

Ang pagpanunggab nahitabo pasado alas-9 sa miaging adlaw sa Upper Private barangay Mantalongon lungsod sa Dalaguete dihang ang duha nag-abot.

Ang biktima nailhan nga si Joseph Ramos, samtang ang suspetsado nailhan usab nga si Alfredo Amancio, 34, molupyo sa sitio Luwak sa samang barangay.

Si SPO2 Pia Cleto mibutyag nga ‘love triangle’ ang ilang gisubay karon nga motibo sa pagpanunggab human gihugon-hugonang adunay relasyon ang asawa sa suspek ug sa biktima.

Gikatahong nakadungog ang suspetsado sa tabi-tabi nga adunay relasyon ang iyang asawa ug ang biktima hinungdan nga iya kining gikomprontase.

Matud pa ni Cleto nga ang biktima ug ang suspetsado nag-inom nianang tungura sa usa ka tindahan ubos sa ilang panimalay ug gumikan sa kahubog nagkainitay sila sa ilang panag-estorya.

Sumala pa ni Cleto nga mibiya ang biktima apan misunod ang suspek ug diha sa balay nahitabo ang panagkomprontase gumikan kay nahiubos ang suspek sa biktima tungod sa pakig-relasyon niini sa iyang asawa.

Gikatahong dunay mga higayong nakit-an sa suspek ang dughan sa iyang asawa nga gidudahang mga ‘kiss marks’ nga maoy nakapasamot sa iyang kahiubos.

Atol sa ilang tinubagay kalit nga gidunggab sa suspek ang biktima diha sa dughan ug tiyan ginamit ang hunting knife ug maoy nakaingon sa hinanaling kamatayon ni Ramos.

Ang suspek boluntaryong mitahan ngadto sa kapolisan niadtong Sabado na sa buntag kauban ang kaliwat nga tanod usab sa ilang barangay. – BANAT NEWS