CEBU, Philippines - Ang siyudad sa Naga nagpatukod og bag-ong sam-ang pampubliko human mapuno ang ilang karaang menteryohan sa barangay West Poblacion, sa maong dakbayan.
Ang bag-ong sam-ang anaa tukora sa usa ka luna nga adunay gilapdong 3,310 metro kuwadrado nga nahimutang sa daplin sa karsada.
Si Mayor Valdemar Chiong sa pakighinabi sa mga tigbalita kagahapon nagkanayon nga matag tuig adunay 400 ngadto sa 500 ka tawo ang mangamatay sa maong siyudad.
Ang daang sam-ang matud pa ni Chiong nga may gilapdong kapin sa 5,000 metro kuwadrado, sukad pa sa iyang pagkamatngon og buot daan na kaayo ug tungod sa kadugay na niini, sa pagkakaron napuno na.
Matud sa mayor nga 2,500 ngadto sa 3,000 lang ka mga nitsu ang ilang buhaton diha sa bag-ong menteryo tungod kay matag lima ka tuig habwaon man ang mga bukog sa patay gikan sa matag nitsu aron kapulihan kini og bag-ong minatay.
Si Chiong midugang nga ang konseho sa siyudad mopasar pa og ordinansa niini aron malubngan na ang bag-ong sam-ang.
Ang tagtungod sa patay nga ilubong sa maong sam-ang magbayad og P500 sulod na kini sa lima ka tuig. – BANAT NEWS