Namatay sa Leptospirosis gisusi na sa City Health

CEBU, Philippines - Gisusi na karun sa Cebu City Health Department ang report nga dunay namatay gumikan sa sakit nga leptospirosis kini maoy unang kaso sa maong sakit dinhi sa Sugbu karung tuiga.

Ang gidudahang nataptan ug namatay sa maong sakit mao ang usa ka Jonathan Menchavez, 39, nga taga barangay Lahug ning siyudad.

Ang sakit nga leptospirosis matud sa Cebu City Health Department makuha lamang sa usa ka tawo tungod sa tubig nga hugaw sama sa naa sa mga kanal.

Mahimong mataptan ang usa ka tawo niini bisan unsang orasa gikan sa mga lim-aw nga tubig nga moresulta gyud sa kamatayon sa tawo.

Si Assistant Epidemiologist sa Cebu City Health Department nga si Dorinda Macasucol nagkanayon nga niadtong Mayo 29 gipahibawo silang na-admit si Menchavez sa tambalanan apan namatay niadtong Mayo 31.

Hinuon giklaro ni Macasucol nga sa pagkakarun wala pa sila makadawat og dugang kasayuran gikan sa ilang kaubanan diha sa Lahug alang na sa dugang detalye niini.

Matud ni Macasucol nga subayon sa ilang buhatan kun diin kini gikan ug diin usab makuha ni Menchavez ang maong sakit ug kini nagsilbing pasidaan sa katawhan ilabi na sa mga tinun-an nunot sa pagbukas sa klase karung sunod semana ug ang nagsingabot nga ting-uwan.

Tambag sa Cebu City Health Department nga kinahanglang manglimpiyo gyud sa palibot ilabi na sa mga tunghaan aron malikay sa mga sakit ang kabataan.

Matud ni Macasucol nga kadtong mga lim-aw duol sa tunghaan ug ang kasapaan kinahanglang malimpyohan.

Mipadala na og suwat ngadto sa mga school principals sa pampublikong tunghaan sa elementarya ug sekondarya ang city health nga mopahigayon sa pagpanglimpiyo sa palibot sa tunghaan sa dili pa pormal buksan ang klase karung sunod semana.

Gawas sa maong sakit gibantayan usab ang sakit nga Dengue nga dinala sa lamok nga mangitlog sa mga napundong tubig.

Gawas niini, nagkanayon si Macasucol nga magbutang usab sila og hand washing booth sa mga tunghaan alang sa pagpanagang sa AH1N1 virus nga posibleng makuha usab sa mga tinun-an. – BANAT NEWS