CEBU, Philippines - Mitiyabaw na ang mga molupyo sa lungsod sa Asturias sa pagpanghubas sa puso sa tubig sa ilang kabalayan epekto sa nasinating huwaw dinala sa El Niño Phenomenon.
Si Asturias mayor Allan Adlawan mikompirmar atol sa usa ka interbyu sa usa ka estasyonan sa radyo nga dili muminos tulo ka mga bukirang barangay sa ilang lungsod ang apektado na karun sa kakuwang sa tubig.
Gitumbok ni Adlawan ang mga bukirang barangay sa Magtalapi, Manggiyaw ug Bogo kansang mga puso nangahubas.
Ang lungsod nagpatabang na sa kabomberohan ug mao karoy temporaryong naghatud og tubig matag adlaw sa mga molupyo sa maong mga barangay aron dunay magamit.
Pagkakarun gitun-an pa sa mga opisyal sa lungsod ang pagpahigayon og drilling pagkuha og temporaryong tinubdan sa tubig samtang padayon pang nasinati ang grabeng huwaw.
Gipanghinaot sa mga opisyal ug molupyo sa maong lungsod nga moabot na ang ting-uwan aron mabuhi og balik ang nangamatay ug hapit na mamatay nga mga pananom sa bukid. – BANAT NEWS