CEBU, Philippines - Mikabat ngadto sa usa ka oras ang pagkabara sa trapiko ug hangtud sa oras niining pagbalita (alas-4 sa hapon) wala pa mabalik ang kuryente diha sa eskina sa South Coastal Road, sa dalan Rabaya, barangay Cansojong, dakbayan sa Talisay human ang usa ka heavy equipment nga gikarga usab sa prime mover truck nasangit sa kable sa kuryente ug telepono kagahapon sa alas 2:30 sa hapon.
Si SPO4 Henry Obiso, hepe sa Talisay City Traffic Division miila sa drayber sa truck nga si Federico Villarta, 55, taga barangay Lutac, dakbayan sa Naga diin temporaryo lang una nilang gitanggong ang lisensiya niini.
Ang nahisgutang truck nga gipanag-iya sa FDR Construction nalarot ug nabali ang usa ka kongkretong poste sa Visayan Electric Company (VECO) tungod kay napugngan kini sa mga kable ug laing lima pa ka poste ang mitakilid.
Matud ni Obiso nga ang buhatan sa FDR naa lang diha sa Cansojong ug halos matag adlaw moagi gyud ang ilang truck sa maong lugar.
Ang mga sakop sa VECO nagkarakara kagahapon sa pagpabalik sa linya sa kuryente. – BANAT NEWS