Sanchez mireklamo gi-harass

CEBU, Philippines - Si Bise Gobernador Gregorio Sanchez mihulagway nga usa ka harassment ang pagbahad ni Capitol consultant on Information Rory Jon Sepulveda nga pasakaan siya og kaso tungod sa iyang paggamit sa iyang mga empleyado aron maugmad ang uma didto sa Tuburan.

Sumala pa ni Sanchez nga nasayod siya nga kutob lang sa hulga si Sepulveda agi og balos sa iyang pag-awhag kang Gobernador Gwendolyn Garcia nga tangtangon si Sepulveda sa iyang pagka-consultant tungod kay nagpataka lang kini og tubag sa mga sakop sa media.

Matud pa ni Sanchez nga wala siya mahadlok sa hulga ni Sepulveda nga ikiha siya sa buhatan sa gobernadora tungod kay walay kamatuoran ang pasangil niini nga iyang gipatrabaho ang iyang mga empleyado paglambo sa iyang uma. Si Sanchez nagkanayon nga nahibalo ang gobernadora nga ang mga kalihukan sa iyang uma didto sa Tuburan pulos mga agricultural program sa Kapitolyo sanglit gitambongan man kini ni Provincial Agriculturist Necias Vicoy Jr. ug apil na ang inahan sa gobernadora nga si kanhi Judge Esperanza Garcia.

Gipakita ni Sanchez ang video footage diin didto mitambong si Vicoy ug Esperanza Garcia sa kalihukan sa usa ka umahan sa Tuburan.

Gitataw sa bise gobernador nga sa higayon nga isang-at ni Sepulveda ang kasong nahunahunaan niini batok kaniya, iyang himuon nga testigos si Vicoy ug inahan sa gobernadora pabor kaniya.

Matud pa ni Sanchez nga nasayod siya nga ang hulga nga ikiha siya ni Sepulveda sinugdanan pa lamang kini sa paggukod sa gobernadora batok kaniya karon nga mitapon na siya sa oposisyon.

Si Sanchez midugang nga iyang gipaabot nga may mosunod pang mga harassment gikan sa buhatan sa gobernadora tungod lamang sa politika. Apan dili kini makapugong kaniya sa pagbulgar sa mga anomaliya sa kagamhanan sa lalawigan ubos sa pagdumala ni Garcia. - BANAT NEWS