'Tulisan' miluba sa sundalo nadakpan sa kapolisan

CEBU, Philippines - Nasikop ang usa sa tulo ka giingong notadong tulisan nga maoy nakaangol sa usa ka sundalo ug nanulis sa upat ka pasahero sa usa ka pasaheroang jeep pasado alas-5 sa barangay Basak San Nicolas.

Ang nasamdan mao si Technical Sgt. Jovito Mendez, 47, taga dalan V. Rama ug kasamtangan kini nga nadestino sa Central Command samtang ang nakawatan usab mao si Jovelyn Reyes, 36, taga sitio Alegre barangay San Nicolas kinsa nakuhaan og P1,400.Samtang ang mga suspetsado nailhan nga si Romar Alonzo alyas Negro kinsa nasikop sa kapolisan samtang gawasnon pa ang mga kauban niining sila si Samson Batobalonos ug Charlie Cominguez alyas Aye.Base sa imbestigasyon sa kapolisan sa Theft and Robbery Section ang mga biktima sakay sa usa ka jeepney dihang gipara sa mga tulisan sa may Jai-Alai Mambaling ug kalit mideklarar og tulis. Gikatahong sa kahadlok sa mga pasahero dali nilang gitunol ang ilang kabtangan apan si Mendez nagmagahi ug mirason nga wala kini kwarta apan kalit gihansak ni Alonzo sa dala niining ‘tres kantos’ ang paa sa sundalo.

Si Cebu City Police Office Director Patrocinio Comendador mibutyag nga ang tulo notado gyung tulisan sa maong dapit, gani si Batobalonos makapila na magbalik-balik sa prisohan.

Si Alonzo kinsa nadakpan sa gihimong hot pursuit operation mihimakak nga maoy midunggab sa sundalo kay igo ra siyang mimando sa drayber sa jeep nga pahunongon kini. – BANAT NEWS