Kampanya vs. rabies hingusgan

CEBU, Philippines - Pormal nang gibuksan kagahapong adlawa ang usa ka buwan nga kalihokan nga mao ang “Rabbies Awareness Month” alang sa paghingusog sa kampanya batok sa sakit nga rabies dinhi sa dakbayan sa Sugbu.

Si Alice Utlang ang City Veterinarian nagkanayon nga ang ilang paghingusog karun sa kampanya batok sa rabies mahitungod kini sa padayong pagsaka sa mga napaakan og iro niining panahon sa ting-init.

Si Utlang mitataw nga usa sa highlights sa usa ka buwang kalihukan mao ang “Asong Pinoy Program” diin niining higayona pasidunggan usab ang mga barangay nga dunay maayong gipakita ug epektibong kampanya batok sa rabies.

Unya sa Hunyo 27, ang barangay Apas pasidunggan sa kagamhanan sa dakbayan tungod kay kini maoy dunay labing maayo og programa sa kampanya batok sa rabies.

Gani ang kagamhanan sa dakbayan mopahigayon usab og house-to-house nga pagbakuna sa mga iro ngadto sa kabaranggayan aron makab-ot ang “zero rabies” sa dakbayan. - BANAT NEWS