Sakop sa gang nadakpan

CEBU, Philippines - Lima ka giingong mga sakop sa gang ang gidakop sa gipahigayong saturation drive sa Anti-Street Hoodlum task Force (A-Shot) sa Cebu City Police Office niadtong Martes sa gabii diha sa usa ka imnanan sa V. Rama Extension, barangay Guadalupe, dakbayan sa Sugbo.

Tulo sa maong mga nasikop pulos menor de edad ug usa kanila nagpangidaron og 15-anyos ang nakuhaan og kalibre .22 nga pusil nga dunay tulo ka buhing bala.

Upat sa maong mga batan-on ang gipabuhian sa mga polis tungod kay walay nakitang kalapasan sa balaod.

 Si Senior Inspector Bonifacio Garciano ang hepe sa Theft and Robbery Section ug team leader sa A-Shot sa pakighinabi niini sa Banat News mibutyag nga matag gabii ang operasyon batok sa mga gangs ug fraternities.

Ang mga gangs ug fraternities nga sagad mopasiugda og kagubot ug ang ilang naandang mga estambayanan maoy sagad nga bisitahon sa kapolisan.

Ang nahisgutang menor de edad gipasakaan sa kapolisan og kasong illegal possession of firearms ug kalapasan sa Comelec gun ban. - BANAT NEWS