Nangita sa kabiling yuta gitigbas

CEBU, Philippines - Kritikal ang kahimtang sa usa ka lolo human tigbasa sa iyang paryente gumikan sa ilang bangi bahin sa kabiling yuta sa ilang katiguwangan didto sa barangay Mantalongon lungsod sa Barili niadtong Lunes sa ala 1:30 sa hapon.

Ang biktima mao si Rogelio Villanueva, 67 , biyudo nga taga lungsod sa San Fernando, samtang ang suspek mao si Reynaldo Empleo, 61, byudo usab nga taga Mantalongon ug paryente ra sa biktima.

Si SPO2 Zaldy Orello sa Barili Police Station mibutyag sa Banat News nga ang biktima midu-aw sa Mantalongon aron pagsusi sa yuta nga kabilin sa ilang ginikanan sa maong dapit.

Apan sa tantong estorya sa biktima ug sa suspek sa tugkaran sa balay ni Sergio Bakeler, nagkalalis sila ug dihang miinit na, milanit ang suspetsado sa iyang gitakin nga sundang ug gihabas ang biktima.

Nasalbar ang kinabuhi sa biktima luyo sa daghang mga samad sa nagkalainlaing bahin sa iyang lawas, dihang miabot si kapitan Norman Anore kauban ang mga tanod niini ug maoy misanta sa pagpanigbas sa suspetsado ngadto sa biktima.

Gihatod dayon ang biktima ngadto sa Barili District Hospital apan gibalhin kini sa tambalanan sa dakbayan sa Sugbo samtang ang suspetsado boluntaryong mitahan sa kapolisan ug nagtingkagol na karon sa prisohan sa Barili . (BANATNEWS)